اعترافات #نرجسي 😈😈😈 ١/ لو حصلت مشكلة بينا هتهمك انتي السبب فيها وهفقدك ثقتك بنفسك واوهمك انك بتفهمي كل حاجة غلط. ٢/ لو ما نفذتيش اللي طلبته هعملك صمت عقابي ، تكلميني وما اردش تتصلي واشوف المكالمة واكنسل لحد ما تنهاري وتقدمي تنازلات. ٣/ هفضل استفزك بشكل مش ملموس وكلام غير مباشر لحد ما تتنرفزي واحيانا تصوتي واقول للناس شوفوا بتعمل ايه؟ دي خلاص اتجننت رسمي! ٤/ هقرب من اتنين تلاتة من عيلتك و هكسبهم في صفي وهشككهم فيكي لو فكرتي تشتكي مني ٥/هتحسي وقت الخصام اني واحد تاني ولا كأنك تعرفيني ( جحود/غدر/ عدم الاحساس بيكي مهما تعملي ) ٦/هبقى كريم ودمي خفيف وبهزر مع الناس اللي بينا عشان لما تشتكي من نكدي يقولولك ده بيهزر وكويس انتي اللي مش عارفة تتعاملي معاه. ٧/ لو فكرتي تشتكيني لحد هعملك تشويه سمعة وهقلب الموقف لصالحي. ٨/ لو قعدتيني حتى مع مختص نفسي هعرف اخدعه وامثل عليه ان انا طيب وانتي اللي عصبية عشان نطلع من عند المختص انتي اللي غلطانة وانا طيب وغلبان وهرجع احكي ل اهلك واهلي وكل الناس عشان يعرفوا انا تعبان معاكي قد ايه. ٩/ لو قعدتيني مع شيخ هختار شيخ من فكر معين توجهاته كلها حقوق الراجل عشان يقعد يكلمك عن فضل الزوج ولو جيتي تعترضي بعدها هقولك ( حرام عليكي حتى الشيخ روحناله هعملك ايه تاني) ١٠/ احيانا كده بعد الخناق هتلاقيني بصالحك وبراضيكي بالشكل اللي يرفعك لأعلى سماء ، لازم اخليكي تفقدي صوابك معايا وماتعرفيش انا وِحِش ولا كويس وتفضلي شاكة في نفسك. ١١/ عمري ما هعترف اني غلطان عشان ماتعشميش نفسك انك في مرة تسمعي مني كلمة اسف ده ااذا ماخلتكيش تحسي بالذنب وتعتذريلي لانك السبب في اللي انا وصلت ليه. هفضل مستمتع انك متعلقة تعلق مرضي بيا واتمنى ماتدوريش على حلول لفك تعلقك بيا ده ابدا💪 - ما لا يقوله #النرجسي كتبته ليكم على هيئة اعترافات منه (مجازا طبعا ) 😈